awareinternational A Credible Source Of News
مسلم لیگ نواز کے قائد اور سابق وزیراعظم نواز شریف پر سینیئر صحافی ارشد شریف کے قتل کا الزام لگانے والا تسنیم حیدر خود قتل کیس کا مفرور ملزم نکلا۔دستاویز کے مطابق ملزم 15 مئی 2004 کو تھانہ صدر گجرات کے قتل کیس کی تفتیش کا ملزم ہے۔قتل کے اس واقعے میں تقریباً 17 افراد جاں بحق ہوئے تھے۔پنجاب پولیس ذرائع کے مطابق تسنیم حیدر شاہ قتل کیس کی تفتیش کے دوران ملزم نامزد ہوا۔ ملزم تسنیم حیدر کا تعلق ضلع گجرات کے علاقے مدینہ سیداں سے ہے دوسری جانب مسلم لیگ نواز کی ترجمان مریم اورنگزیب اور ن لیگ برطانیہ کے صدر زبیر گل نے تسنیم حیدر سے متعلق تردیدی بیانات جاری کردیے۔ زبیر گل نے کہا کہ تسنیم حیدر مسلم لیگ (ن) کے ترجمان ہرگز نہیں ہیں، ان کے الزامات پر انہیں برطانوی عدالت لے کر جائیں گے۔انہوں نے مزید کہا کہ یہ ڈرامہ ارشد شریف کے اصل قاتلوں سے توجہ ہٹانے کے لیے رچایا گیا ہے۔ن لیگ برطانیہ کے صدر نے یہ بھی کہا کہ تسنیم حیدر کے دائیں اور بائیں بیٹھے دونوں افراد پی ٹی آئی کے لیڈر ہیں۔ان کا کہنا تھا کہ تسنیم حیدر کے ساتھ بیٹھے لوگ نواز شریف کے گھر کے باہر مظاہرے کرواتے ہیں۔مریم اورنگزیب نے اپنے بیان میں کہا کہ تسنیم حیدر ن لیگ لندن کے ترجمان نہیں ہیں، ان کا پارٹی سے کوئی تعلق نہیں۔انہوں نے کہا کہ تسنیم حیدر کے پاس ثبوت ہیں تو وہ جے آئی ٹی کے قانونی فورم پر پیش کریں۔ن لیگ پاکستان کی ترجمان نے مزید کہا کہ تصویر میں نظر آنے والا شخص پی ٹی آئی لندن کا آرگنائزر ہے، فیک نیوز سے ارشد شریف کے اصل قاتلوں سے توجہ ہٹائی نہیں جاسکتی۔
