ارشد شریف کی کینیا میں ہلاکت، اسلام آباد ہائیکورٹ نے جوڈیشل کمیشن کی درخواست مسترد کردی

ارشد شریف کی کینیا میں ہلاکت کے معاملے پر جوڈیشل کمیشن کے قیام کی درخواست اسلام آباد ہائیکورٹ نے مسترد کردی۔چیف جسٹس اسلام آباد ہائی کورٹ جسٹس اطہر من اللہ نے کینیا میں پولیس کی فائرنگ سے جاں بحق ہونے والے صحافی ارشد شریف کا جسد خاکی وطن واپس لانے اور معاملے کی تحقیقات کے لیے جوڈیشل کمیشن کی تشکیل کی درخواست پر سماعت کی

وزارت خارجہ و داخلہ کے نمائندے عدالت کے روبرو پیش ہوئے اور اپنی رپورٹس ایڈیشنل اٹارنی جنرل کے پاس جمع کرادیں۔ڈپٹی اٹارنی جنرل نے عدالت کے روبرو موقف اختیار کیا کہ ارشد شریف کے ساتھ پیش آنے والا واقعہ انتہائی افسوسناک ہے، اس حوالے سے کینیا کی حکومت کی رپورٹ کا انتظار کيا جائے، اگر درخواست گزار کو رپورٹ پر کوئی اعتراض ہو تو اس کیس کو دوبارہ سن لیا جائے

جوڈیشل کمیشن کے قیام کی درخواست پر جسٹس اطہر من اللہ نے ریمارکس دیئے کہ یہ دو ملکوں کا معاملہ ہے، ریاست کے ادارے بہتر طور پر اس معاملے کو حل کرسکتے ہیں، اس مرحلے پر کمیشن بنانے کا کوئی فائدہ نہیں ہوگا۔عدالت عالیہ نے کیس کی سماعت ایک ہفتے کے لیے ملتوی کرتے ہوئے انکوائری سے متعلق صحافتی تنظیموں کو آگاہ رکھنے کا حکم دے دیا